इतिहासापासून कृत्रिम बुद्धिमत्तेपर्यंत मानवी प्रगतीचा अभ्यासपूर्ण प्रवास सादर
या कार्यक्रमासाठी प्रमुख पाहुणे म्हणून रेव्ह. फादर टॉम मंगलथील उपस्थित होते. तसेच शिक्षण विभागाचे बी.ई.ओ. माननीय राम फरकांडे, शिक्षण विस्तार अधिकारी अन्सार शेख, शाळा व्यवस्थापक रेव्ह. फादर मायकल, प्राचार्य बीजू अँथनी आणि उपप्राचार्य रेव्ह. फादर जिमसन आदी मान्यवर उपस्थिती लाभली.
मान्यवरांच्या शुभहस्ते प्रदर्शनाचे उद्घाटन करण्यात आले. उद्घाटनप्रसंगी उपस्थित मान्यवरांनी विद्यार्थ्यांच्या उपक्रमशीलतेचे, कष्टाचे व वैज्ञानिक विचारांचे मनापासून कौतुक केले. विद्यार्थ्यांनी केवळ पुस्तकी ज्ञानापुरते मर्यादित न राहता प्रयोगशील, संशोधनात्मक व नावीन्यपूर्ण दृष्टिकोन ठेवावा, असा मोलाचा सल्ला यावेळी देण्यात आला.
या कला व विज्ञान प्रदर्शनामध्ये अश्मयुगीन कालखंडापासून ते आधुनिक ए.आय. (Artificial Intelligence) तंत्रज्ञानापर्यंतचा मानवी विकासाचा प्रवास प्रभावीपणे मांडण्यात आला होता. आदिमानवाचे जीवन व साधने, शेतीचा विकास, औद्योगिक क्रांती, विज्ञानातील महत्त्वाचे शोध, आधुनिक तंत्रज्ञान, डिजिटल युग, कृत्रिम बुद्धिमत्ता तसेच भविष्यातील स्मार्ट सिटीची संकल्पना विद्यार्थ्यांनी आकर्षक मॉडेल्स, चार्ट्स व प्रात्यक्षिकांच्या माध्यमातून सादर केली.
विद्यार्थ्यांनी सादर केलेली मॉडेल्स पाहताना उपस्थित पालक, शिक्षक व पाहुणे भारावून गेले. प्रत्येक विद्यार्थ्याने आपल्या प्रकल्पाची माहिती आत्मविश्वासाने, सोप्या भाषेत व प्रभावीपणे मांडली. यामुळे विद्यार्थ्यांच्या संप्रेषण कौशल्याचा, निरीक्षणशक्तीचा तसेच वैज्ञानिक दृष्टिकोनाचा उत्तम विकास झाल्याचे स्पष्टपणे दिसून आले.
या संपूर्ण प्रदर्शनाच्या यशस्वी आयोजनासाठी शाळेतील शिक्षक व शिक्षकेतर कर्मचारी यांनी नियोजन, मार्गदर्शन व अंमलबजावणीच्या प्रत्येक टप्प्यावर अथक परिश्रम घेतले. त्यांच्या सहकार्यामुळे व मेहनतीमुळे हा उपक्रम अत्यंत शिस्तबद्ध व यशस्वीरीत्या पार पडला.
एकूणच अल्फोंन्सा स्कूल, जत येथील हे कला व विज्ञान प्रदर्शन अत्यंत यशस्वी व प्रेरणादायी ठरले. या उपक्रमामुळे विद्यार्थ्यांना प्रत्यक्ष अनुभवातून शिकण्याची मौल्यवान संधी मिळाली. शिक्षकांचे मार्गदर्शन, व्यवस्थापनाचे सहकार्य आणि विद्यार्थ्यांची मेहनत यामुळे हा उपक्रम संस्मरणीय ठरला असून, अशा शैक्षणिक उपक्रमांच्या माध्यमातून विद्यार्थ्यांच्या सर्वांगीण विकासासाठी शाळेची बांधिलकी पुन्हा एकदा अधोरेखित झाली आहे.