मृत विकासचा लाकडी पट्ट्या व दगड ठेचून निर्घृण खून; दारूचे बिल देण्यावरून खून केल्याची कबुली
जतवार्ता न्यूज नेटवर्क;
जत येथील कृषी उत्पन्न बाजार समितीअंतर्गत जनावर बाजाराच्या आवारात घडलेल्या खूनप्रकरणाचा स्थानिक गुन्हे अन्वेषण शाखा, सांगली यांनी अवघ्या काही तासांत उलगडा करत दोन आरोपींना अटक केली आहे. दारूचे बिल देण्यावरून मृत विकास याच्यावर दगड व बॅटन पट्टीने प्राणघातक हल्ला करण्यात आल्याचे तपासात निष्पन्न झाले आहे.
दि. १८ डिसेंबर रोजी जत कृषी उत्पन्न बाजार समितीच्या जनावर बाजारात एका तरुणाचा रक्तबंबाळ अवस्थेत मृतदेह आढळून आला होता. या घटनेमुळे जत शहरासह परिसरात एकच खळबळ उडाली होती. मृत तरुणाचे नाव विकास मलकारी टकले (वय २२ वर्षे, रा. टकलेवस्ती, उमदी, ता. जत, जि. सांगली) असे निष्पन्न झाले. या घटनेप्रकरणी जत पोलीस ठाण्यात भा.दं.वि. कलम ३०२ अन्वये गुन्हा दाखल करण्यात आला होता. घटनेचे गांभीर्य लक्षात घेऊन स्थानिक गुन्हे अन्वेषण शाखेचे पथक तपासासाठी रवाना करण्यात आले.
तपासात आरोपी निष्पन्न;
तपासादरम्यान पोलिसांनी घटनास्थळावरील सीसीटीव्ही फुटेज व गोपनीय बातमीदारांकडून संशयतांची ओळख पटवून एलसीबीच्या पथकाने रविंद्र आबासाहेब बंडगर वय ३० व विराज संजय पाटील वय २० (रा. शिवाजी पेठ, जत, जि. सांगली) या दोन आरोपींना अटक केली आहे.
खुनाची पद्धत उघड;
आरोपींची कसून चौकशी केल्यानंतर त्यांनी सांगितले की, रविंद्र बंडगर व त्याचा मित्र विराज पांढरे हे जत मार्केट यार्ड येथे शेकोटीजवळ बसले होते. तेथे मृत विकास शेकोटीजवळ येवून बसला होता. रविद्र बंडगर व विराज पांढरे यांचेसोबत मयत इसम विकास टकले यांचेत ओळख झाली. रविद्र बंडगर व विराज पांढरे यांना मयत इसमाने दारु पिण्याकरीता पैसे देतो असे सांगुन, दारु घेण्याकरीता दुकानाजवळ घेवून गेला. तेथे गेल्यानंतर विकास टकले याने त्याचेकडे पैसे नसल्याचे सांगितले. रविंद्र बंडगर व विराज पांढरे यांना विकास टकले याचेकडे पैसे नसताना दारू देतो असे खोटे बोलून शेकोटीजवळून उठवून घेवून गेला याचा राग आल्याने त्यास धडा शिकवूया असे रविद्र बंडगर व विराज पांढरे यांनी ठरवून विकास टकले यास मोटार सायकलवरुन जत येथील जनावर बाजार आवारात घेवून जावून लाकडी बॅटन पट्टीने मारहाण करीत असताना त्याने रविद्र बंडगर व विराज पांढरे यांना आईवरून अश्लिल शिवीगाळी करू लागल्याने रविद्र बंडगर व पांढरे यांनी चिडुन मयत विकास टकले याचे अंगावरील कपडे काढुन टाकून डोक्यात दगड घालून खुन केला असल्याचे सांगितले. दोघांना अटक करून जत पोलिसांच्या ताब्यात देण्यात आले आहे.
पोलीस अधिकाऱ्यांचे मार्गदर्शन;
एलसीबीचे पोलीस निरीक्षक संजीव झाडे यांच्या मार्गदर्शनाखाली सहायक निरीक्षक पंकज पवार, सोमनाथ गुंडे, संदीप नलावडे, अमर नरळे, सागर लवटे, अमिरशा फकीर, सागर टिंगरे, संदिप गुरव, सतिश माने, मच्छिन्द्र बर्डे, आमसिध्द खोत, उदय माळी, केरबा चव्हाण, विक्रम खोत, सायबर पोलीस ठाण्यातील अभिजित पाटील व अजय पाटील यांच्या पथकाने ही कारवाई केली.