जत | प्रतिनिधी :
जत तालुक्यात निर्माण झालेली दुष्काळी परिस्थिती आणि जत शहरातील वाढता पाणीप्रश्न लक्षात घेता, शहराला पाणीपुरवठा करणाऱ्या बिरनाळ तलावात म्हैसाळ योजनेचे पाणी तातडीने सोडण्यात यावे, अशी मागणी अहिल्यादेवी समाज प्रबोधिनी मंचचे अध्यक्ष तथा सामाजिक कार्यकर्ते प्रकाश व्हनमाणे यांनी केली आहे.
याबाबत प्रकाश व्हनमाणे यांनी म्हैसाळ योजनेच्या संबंधित अधिकाऱ्यांची भेट घेऊन चर्चा केली. यावेळी जत शहरासाठी पाणीपुरवठा करणाऱ्या बिरनाळ तलावामध्ये पाणी सोडण्याची मागणी त्यांनी केली. मात्र, बिरनाळ तलावाची सध्याची स्थिती आणि त्यात पाणी सोडण्यासंदर्भातील तांत्रिक बाबींचा विचार करणे आवश्यक असल्याचे अधिकाऱ्यांकडून सांगण्यात आल्याचे त्यांनी प्रसिद्धीपत्रकात नमूद केले आहे.
जत शहराची लोकसंख्या मोठी असून शहराला पाणीपुरवठा करण्यासाठी बिरनाळ तलाव महत्त्वाचा स्रोत आहे. सध्या पावसाअभावी तालुक्यातील अनेक जलस्रोतांवर परिणाम झाला असून पिण्याच्या पाण्याचा प्रश्न गंभीर बनत आहे. त्यामुळे उपलब्ध पाणीसाठ्याचे नियोजन करून नागरिकांना नियमित व पुरेसा पाणीपुरवठा करणे गरजेचे असल्याचे व्हनमाणे यांनी म्हटले आहे.
दरम्यान, बिरनाळ तलावामध्ये गाळ साचल्याने पाणीसाठ्यावर परिणाम होत असल्यास त्याचीही तातडीने पाहणी करून आवश्यक उपाययोजना कराव्यात, अशी मागणी त्यांनी केली आहे. शहरातील नागरिकांना पाणी मिळण्यासाठी नगरपालिका प्रशासनानेही संबंधित यंत्रणांशी समन्वय साधून ठोस पावले उचलावीत, अशी अपेक्षा त्यांनी व्यक्त केली.
जत तालुक्यातील शेतकरी, पशुपालक आणि नागरिकांना सध्या पाणीटंचाईचा सामना करावा लागत आहे. अशा परिस्थितीत प्रशासनाने पाणी उपलब्धतेला सर्वोच्च प्राधान्य देऊन उपाययोजना कराव्यात. महाराष्ट्र शासनाने जत तालुका दुष्काळी घोषित करून दुष्काळी उपाययोजनांची प्रभावी अंमलबजावणी करावी, अशी मागणीही व्हनमाणे यांनी केली आहे. शहरातील पिण्याच्या पाण्याचा प्रश्न अधिक गंभीर होण्यापूर्वी बिरनाळ तलावासह उपलब्ध जलस्रोतांचा आढावा घेऊन तातडीने पाणी नियोजन करावे, असेही त्यांनी प्रसिद्धीपत्रकातून स्पष्ट केले आहे.